نعت رسولِ کریم ﷺ
۔۔۔۔۔۔۔۔۔۔۔۔۔۔
(تضمین بر شعرِ اقبال)
دشتِ جنوں نواز میں، تیز ہے یاد کی ہَوا
لحظہ بہ لحظہ کم تو ہے، قلب و نظر کا فاصلہ
دل کی اُسی گلی ہے، حسرتِ پا شکستگی
ذرے میں جس کے کہکشاں، خاک ہے جس کی کیمیا!
مہر و مہ و نجوم سب، تیرہ جبیں ہیں گر نہ ہو
نورِ حیات و کائنات، یعنی جمالِ مصطفٰے
چہرہ کہ جس کی تاب سے، جلوہء قدسیاں طلوع
زلف کہ جس کے سائے میں، صبح و مسا کا سلسلہ
اب یہ کھلا کہ درد کا، رشتہ تھا زخم زخم سے
اشک جدا جدا سہی، پھر بھی رواں ہے قافلہ
کیسی عجب نماز وہ، قبلہء اوّلیں کی تھی
سرورِ دو سرا امام، پیچھے تمام انبیاء
اُن کی نگاہِ درد جُو، دل کو ٹٹولنے لگی
سُن لی گئی ہجوم میں، ایک نوائے بے نوا
"خواجہء من نگاہ دار، آبروئے گدائے خویش
آں کہ زجوئے دیگراں، پر نہ کند پیالہ را”
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اجرا، کراچی
مدیر: احسن سلیم
کتابی سلسلہ ۲
اپریل تا جون ۲۰۱۰ء
