نہ بھولا اضطرابِ دم شماری، انتظار اپنا
کہ آخر شیشہء ساعت کے کام آیا غبار اپنا
زبس آتش نے فصلِ رنگ میں رنگِ دگر پایا
چراغِ گُل سے ڈھونڈھے ہے چمن میں شمع خار اپنا
اسیرِ بے زباں ہوں، کاشکے! صیادِ بے پروا
بہ دامِ جوہرِ آئینہ، ہو جاوے شکار اپنا
مگر ہو مانعِ دامن کشی، ذوقِ خود آرائی
ہوا ہے نقش بندِ آئینہ، سنگِ مزار اپنا
دریغ! اے ناتوانی! ورنہ ہم ضبط آشنایاں نے
طلسمِ رنگ میں باندھا تھا عہدِ اُستوار اپنا
اگر آسودگی ہے مدعائے رنجِ بے تابی
نیازِ گردشِ پیمانہء مے روزگار اپنا
اسد! ہم وہ جنوں جولاں، گدائے بے سر و پا ہیں
کہ ہے، سر پنجہء مژگانِ آہو، پشت خار اپنا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
دیوانِ غالب کامل
مرتبہ: کالی داس گپتا رضا