جدلیاتی خواب ۔۔۔ الیاس بابر اعوان

جدلیاتی خواب
۔۔۔۔۔۔۔۔۔۔۔
جمالِ رفتہ پہ گردِ وحشت پڑی ہوئی ہے
گھنے درختوں کی جن قطارں پہ نیم خندہ تھا لَو کا موسم
سنا ہے پتے گرارہی ہیں ندی کے ٹھٹھرے ہوئےبدن پر
ندی کا کیا ہے!
شکوہِ دامن سے لمس زندہ ، بہار قائم
لہو کی تہذیب کے منافی کبھی ہُوا ہے!
یہ آبناے فروغِ ابہام
دیکھتے ہیں کہاں پہ جائے
کہاں پہ ٹھہریں بصارتوں کے چنیدہ قصے
جنھیں بہایا گیا تھا اچھے گماں کی خاطر
ندی کے پانی کی طشتری میں
ذرا یہ دیکھو سجیل پتھر کہ جیسے آنکھیں سجی پڑی ہوں
براے سوداگرانِ انجم
ندی کو پتھر سے کیا غرض ہے
ندی کو اذنِ سفر ملا ہے، سو یہ چلے گی
بصارتوں کے لطیف موسم یونہی رہیں گے
جمالِ رفتہ کا ذکر کیسا
ہمارا قصہ نئے زمانے کی لوحِ تازہ
کے حاشیے پر لکھا ملے گا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ماہ نامہ فانوس، لاہور
جلد: ۵۸، شمارہ: ۷
جولائی ۲۰۱۸ء

Related posts

Leave a Comment