نئی صبح ۔۔۔۔ اختر الایمان

نئی صبح
۔۔۔۔۔۔۔
کالے ساگر کی موجوں میں ڈوب گئیں دھندلی آشائیں
جلنے دو یہ دیے پرانے خود ہی ٹھنڈے ہو جائیں گے
بہہ جائیں گے آنسو بن کر روتے روتے سو جائیں گے
اندھے سایوں میں پلتے ہیں مبہم سے غمگین فسانے
دکھ کی اک دیوار سے آ کر ٹکرا جاتے ہیں پروانے
دورِ فسردہ کی انگڑائی    لَے بن بن کر ٹوٹ رہی ہے
سرخ زباں کی نازک لَو پر جاگ رہی ہے ایک کہانی
ٹوٹے پھوٹے جام پڑے ہیں سوئی سوئی ہے کچھ محفل
دھوپ سی ڈھل کر بیت گئی ہے ساقی کی مجبور جوانی
کیا جانے کب سورج نکلے، بستی جاگے، غم مٹ جائیں؟

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

مجموعہ کلام: آب جو

نیا ادارہ  لاہور

Related posts

Leave a Comment