مٹی تھی کس جگہ کی
۔۔۔۔۔۔۔۔۔۔۔۔۔۔۔۔۔
بے فیض ساعتوں میں
منہ زور موسموں میں
خود سے کلام کرتے
اکھڑی ہوئی طنابوں
دن بھر کی سختیوں سے
اکتا کے سو گئے تھے
بارش تھی بے نہایت
مٹی سے اٹھ رہی تھی
خوشبو، کسی وطن کی
خوشبو سے جھانکتے تھے
گلیاں، مکاں، دریچے
اور بچپنے کے آنگن
اک دھوپ کے کنارے
آسایشوں کے میداں
اُڑتے ہوئے پرندے
اک اجلے آسماں پر
دو نیم باز آنکھیں
بیداریوں کی زد پر
تاحدِ خاک اُڑتے
بے سمت، بے ارادہ
کچھ خواب فرصتوں کے
کچھ نام چاہتوں کے
کن پانیوں میں اُترے
کن بستیوں سے گذرے
تھی صبح کس زمیں پر
اور شب کہاں پہ آئی
مٹی تھی کس جگہ کی
اُڑتی پھری کہاں پر
اس خاکداں پہ کچھ بھی
دایم نہیں رہے گا
ہے پائوں میں جو چکر
قائم نہیں رہے گا
دستک تھی کن دنوں کی
آواز کن رُتوں کی
خانہ بہ دوش جاگے
خیموں میں اُڑ رہی تھیں
آنکھوں میں بھر گئی تھیں
اک اور شب کی نیندیں ۔۔۔
اور شہرِ بے اماں میں
پھر ۔۔۔ صبح ہو رہی تھی
