گزشتہ عشق کا ہر اک نشان ڈھونڈوں گا
میں اپنی کھوئی ہوئی داستان ڈھونڈوں گا
۔۔۔۔۔۔۔۔۔۔
یہ پھول، پیڑ، پرندے، قلم، چراغ اور تیغ
میں ان میں اپنا کوئی ترجمان ڈھونڈوں گا
۔۔۔۔۔
ہزاروں سال پرانے کھنڈر میں گھومتے وقت
عجیب بات کہ اپنا نشاں ملا ہے مجھے
۔۔۔۔۔۔۔
ایک آنسو ہے میرے برتن میں
پیاس کس کس کی بجھائی جائے
۔۔۔۔۔۔۔۔۔۔
کہیں اک روز بہہ نہ جاؤں میں
چشمِ گریہ ترے بہاؤ کے ساتھ
۔۔۔۔۔۔
میں دیکھتا ہوں یہ دنیا تو غور کرتا ہوں
میں یونہی آیا یہاں میرا کوئی کام نہیں
۔۔۔۔۔۔
یہ آئنہ جو مجھے روز و شب سنوارتا ہے
یہی کرے گا کبھی عکس چُور چُور مرا
۔۔۔۔۔۔۔۔۔۔۔۔۔
یہاں میں تخت سے ایسے اتارا جاؤں گا
لڑائی ہونے سے پہلے ہی مارا جاؤں گا
۔۔۔۔۔۔۔۔۔۔۔
گزشتہ عہد کا ملبہ اٹھانے لگ گیا ہوں
میں ایک اور زمانہ بنانے لگ گیا ہوں
۔۔۔۔۔۔
قصہ گو اب تری چوپال سے میں چلتا ہوں
رات بھی بھیگ چکی اور نیند بھی آئی ہوئی ہے
۔۔۔۔۔۔۔۔۔۔۔۔
