انہدام
۔۔۔۔۔
یہ میری دیمک لگی کتابیں
یہ نینوا کی اجل شکستہ گِلی کتابوں کی داستانیں
یہ عہد نامے، یہ کِرمِ تحریف سے لدی،
بھربھری کتابیں
پیمبرانِ خدا کے ’ناقض۔سند‘ قصص،
انحراف آمادہ اُمتوں کی کہانیاں ہیں
ورق ورق فلسفوں کی مربوط داستانیں
یہ عقل و دانش بھری کتابیں
تمام الحاد و زندقہ ہیں
مرے زمانے کی روشنی کے لیے نہیں ہیں
یہ مشرقی اور مغربی حسن کار ذہنوں کی
سعیِ پیہم کی داستانیں
مرے زمانے کی تیرگی کے لیے نہیں ہیں
یہ حرفِ غم، میری روح کا ایک دائمی زخم بن چکا تھا
سو یہ کتابیں سُلگ رہی ہیں!
جمیل ذہنوں کی داستانیں دُھواں دُھواں ہیں!
اِدھرنہ دیکھو!
کہ یہ مرے شہرِمنہدم کے ستم رسیدہ،
شرار دیدہ وجود کا سرمئی دُھواں ہے
یہ حرفِ غم، میری روح کا ایک دائمی زخم بن چکا تھا
یہ غم مرے شہرِ منہدم کے شرار دیدہ وجود کا سرمئی دھواں ہے
اِدھر نہ دیکھو!
کہ یہ مرا سرمئی دھواں ہے!
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مجموعہ کلام: نم گرفتہ
بیاض، لاہور
۶ نومبر ۲۰۱۲ء
