Tag: Razaullah Haider

دل کی بستی میں وہ مہماں نہ ہوا تھا پہلے اس طرح درد کا درماں نہ ہوا تھا پہلے اشک پلکوں پہ ستاروں کی طرح اٹکے ہیں شہر میں ایسے چراغاں نہ ہوا تھا پہلے درد کی طرح تہِ آب رہا درد مگر جس طرح آج ہے عریاں ، نہ ہوا تھا پہلے اس کو آنکھوں میں بسے خواب کی تعبیر ملی اس کا چہرہ یوں گلستاں نہ ہوا تھا پہلے پھر مری فکر کی دہلیز پہ موتی چمکے یہ اُفق رنگِ شبستاں نہ ہوا تھا پہلے

سوادِ گل میں ہے خوشبو براجمان ابھی نہ باغ بیچنے کی باغبان ٹھان ابھی ہمیں ٹھہرنا نہیں ہے گلاب سایوں میں ہماری راہ میں باقی ہیں امتحان ابھی کہاں وفائوں میں سُرخی لہو کی شامل ہے اسی لیے تو ادھوری ہے داستان ابھی ہوائے تند مسلسل ہمارے در پے ہے ہمارے پائوں کے نیچے رہے چٹان ابھی رضا یہ زینت و تزئیں چمن کی ہم سے ہے جو چاہیں ہم تو پڑے پائوں باغبان ابھی

درد کا کوئی نہ یاں درماں کرے جو بھی آئے زخم کو عریاں کرے زندگی بھی تو وفا کرتی نہیں موت ہی سے یوں گلہ انساں کرے میرے گلشن میں اُداسی چھا گئی کوئی آئے بلبلیں رقصاں کرے راستہ تو نے چنا ہے پُرخطر تیری تکلیفیں خدا آساں کرے وہ تو بیٹھا ہے ہوا کے دوش پر کیا کوئی دل کا اسے مہماں کرے زندگانی کے مسائل بڑھ گئے کوئی ذکرِ کاکلِ پیماں کرے بھیگے موسم میں لکھے غزلیں رضا اور اُس کی یاد کو عنواں کرے