ایک لمبی کافر لڑکی
۔۔۔۔۔۔۔۔۔۔۔
وادی کی سب سے لمبی لڑکی کے جسم کے سب مساموں سے
ریشم سے زیادہ ملائم اور نرم خموشی میں
گھنٹیوں کی آوازیں آ رہی تھیں
برکھا کی اس نم زدہ رات میں
جب اس کے جسم پہ قوسِ قزح چمکی
تو گھنٹیاں تیز تیز بجنے لگیں
مرے کانوں میں آہٹیں آ رہی تھیں
دھند سے بھی نرم اور ملائم بادلوں کی دبے پائوں آہٹیں
وہ جب ریشم کے کچے تاروں سے بنی ہوئی
رات کے فرش پر لیٹی
تو قوسِ قزح اور بھی شوخ اور گرم رنگوں میں ڈھلنے لگی
وہ سینکڑوں رنگوں سے مرتب شدہ لڑکی
رات گئے تک گرم رنگوں میں پگھلتی گئی
صبح ہونے پر سورج کی پہلی کرن
روزن سے کمرے میں داخل ہوئی
تو اس کے جسم سے
رات کی خوابیدہ گھنٹیوں کی آوازیں سن کر
اور اس کے جسم پر سوئے ہوئے گرم رنگوں کو دیکھ کر
ایک دم شرما گئی
وادی کی سب سے لمبی لڑکی
دھند سے بھی نرم اور ریشم سے ملائم
۔۔۔۔۔۔۔۔۔۔۔۔۔۔۔۔۔۔۔۔۔۔۔
شعری مجموعہ: تمثال
پبلشر: ارسلان پبلی کیشنز، لاہور
مطبع: قوسین، لاہور
سنِ اشاعت: ۱۹۷۵ء (بار اول)
تبسم کاشمیری ۔۔۔ ایک لمبی کافر لڑکی
