تنویر نقوی ۔۔۔ آپ بیتی

آپ بیتی
۔۔۔۔۔
من کی بات کہی نہ جائے
من کی بات کہی نہ جائے

من کا بھید کہوں کیا اُن سے!
لب تک آ کر، رہ جاتا ہے
اُن سے جو شکوہ ہے مجھ کو
اشکوں میں ہی بہہ جاتا ہے

کون ہے مجھ کو جوسمجھائے
من کی بات کہی نہ جائے

کیوں کر بولوں اُن سے سجنی
کیسی گزریں میری راتیں
کتنا پھیکا ساون بیتا!
کتنی سونی تھیں برساتیں

نینن دکھ کے نیر بہائے
من کی بات کہی نہ جائے

اک پل چین نہ پائوں اُن بِن
یاد آتے ہیں جاگتے سوتے
دن بیتے ہے آہیں بھرتے
رات کٹے ہے، روتے روتے

جینے سے اب جی گھبرائے
من کی بات کہی نہ جائے

یاد نہیں رہتی ہیں باتیں
پریم میں ہوش بھی کھو دیتی ہوں
کہتی ہوں، کہہ دوں گی سب کچھ
جب آتے ہیں، رو دیتی ہوں

دل کی دل ہی میں رہ جائے
من کی بات کہی نہ جائے
۔۔۔۔۔۔۔۔۔۔۔۔۔۔۔۔
مجموعہ کلام: سنہرے سپنے
پبلشر: نرائن دت سہگل اینڈ سنز تاجران کتب، اندرون لاہوری دروازہ، لاہور

Related posts

Leave a Comment