گلگشت ۔۔۔ مجروح سلطان پوری

گلگشت
۔۔۔۔
یہ سوچا چل کے ارضِ کاشمر پر
پِھروں اک بار مَیں بھی ہو کے سرمست

وہاں پہنچا تو دیکھا وادئ گل
خزاں کے رنگ ہیں بالا ہو یا پست

خس و خاشاک بکھرے ہیں چمن میں
نہ کشتِ گل نہ سبزے کا دَر و بست

اُگے ہیں چار سُو پودوں کے مانند
کہیں پر سر کہیں پر بازو و دَست

سپاہِ امن، لشکر تا بہ لشکر
پڑی ہے چشمہء خوں پر سیہ مست

عجب آوازِ گریہ تھی فضا میں
لگا سینے سے دل، کر جائے گا جست

مَیں اِس نظارہء حیرت میں گم تھا
اچانک بول اٹھے اِک میرے ہم دست

اگر فردوس بر رُوئے زمین اَست
ہمیں اَست و ہمین اَست و ہمین اَست

Related posts

Leave a Comment