مقابل وہی پھر گماں آگیا
یہ میں چلتے چلتے کہاں آگیا
ابھی ناؤ تھی لذّتِ موج میں
کہ ساحل ہی کچھ درمیاں آگیا
چھلکتی شبوں کے طلسمات میں
گرفتارِ کوئے بتاں آگیا
کسی ماہ رُو کے اشارے پہ رات
ہواؤں پہ تختِ رواں آگیا
صراحی میں کچھ رنگ تھے موجزن
مرے ہاتھ میں آسماں آگیا
یونہی جوئے نشّہ میں بہتا ہُوا
سوئے دشت ، سروِ رواں آگیا
دشاؤں میں کھلتا گیا کوئی دَر
عجب لہر میں خاکداں آگیا
گریزاں رہے جس سے ہم، روبرو
وہی لمحۂ رایگاں آگیا
کھلے بے نشاں مقبروں پر گلاب
حویلی پہ رنگِ خزاں آگیا
سرِ شام یادوں میں ڈوبے نگر
غزل در غزل کربِ جاں آگیا
ہمیشہ کے رنگوں میں ڈوبا بدن
زمیں پر لیے بارِ جاں آگیا
گھنے جنگلوں میں اچانک کوئی
مرے سامنے بے نشاں آگیا
یہ کن حیرتوں سے گزرنا پڑا
یقیں سے بچھڑ کر گماں آگیا
کہاں لے گیا بے حصاری کا روگ
میں خود میں پلٹ کر میاں آگیا
چراغوں پہ بیتے عجب رتجگے
مکاں اوڑھ کر داستاں آگیا
اُسے آنکھ بھر کر بھی دیکھا نہ تھا
کہ تیرِ قضا ناگہاں آگیا
پکارا تھا خود کو عطاؔ شب ڈھلے
پلٹ کر غمِ جاوداں آگیا
