Urdu ghazal – صفحہ 7

عدیم ہاشمی

ستونِ ریگ نہ ٹھہرا عدیمؔ چھت کے تلے میں ڈھ گیا ہوں خود اپنے کو آسرا دے کر

میں دریا ہوں مگر بہتا ہوں میں کہسار کی جانب مجھے دنیا کی پستی میں اتر جانا نہیں آتا

ہر کوئی پارسائی کی عمدہ مثال تھا دل خوش ہوا ہے ایک گنہ گار دیکھ کر

فاصلے ایسے بھی ہوں گے یہ کبھی سوچا نہ تھا سامنے بیٹھا تھا میرے اور وہ میرا نہ تھا

کیوں سب کی طرح بھیگ گئی ہیں تری پلکیں ہم نے تو تجھے حال سنایا نہیں اتنا

عدیمؔ بیٹھا ہوا ہوں پروں کے ڈھیر پہ میں خوش اس طرح ہوں کہ جیسے کسی اڑان میں ہوں

غم کے ہر اک رنگ سے مجھ کو شناسا کر گیا وہ مرا محسن مجھے پتھر سے ہیرا کر گیا

آئے ہم غالبؔ‌ و اقبالؔ کے نغمات کے بعد مصحفِ عشق و جنوں حسن کی آیات کے بعد

شام ہونے کو ہے جلنے کو ہے شمعِ محفل سانس لینے کی بھی فرصت نہیں پروانے کو

گرتے ہیں سمندر میں بڑے شوق سے دریا لیکن کسی دریا میں سمندر نہیں گرتا