ترا خیال ، کُشادِ فضائے تازہ ہے
ہر انتہائے نظر ، ابتدائے تازہ ہے
پلک جھپکتے ہی منظر بدلنے لگتا ہے
تعلقات کی (ہر پَل) بنائے تازہ ہے
کہ جیسے ٹوٹ رہا ہے سکوت صدیوں کا
ہَوا کے ہونٹ پہ خنداں ، صلائے تازہ ہے
بدل رہی ہے زمیں بھی نئی رُتوں کا لباس
اُفق پہ ناچ رہی اک شعاعِ تازہ ہے
چمن چمن ، ترے جلووں کے رنگ بکھرے ہیں
صدف صدف ، گہر افشاں ، ادائے تازہ ہے
بُلا رہی ہے ابھی تیرے جسم کی خوشبو
سما رہی مرے سر میں ہَوائے تازہ ہے
اُٹھا گیا مرے پہلو میں کون ، دردِ سفر
کہ ہر قدم ، ہوسِ جادہ ہائے تازہ ہے
ابھی کسی کو نہیں ، اِس خلا کا اندازہ
حریمِ جاں سے ابھی انخلائے تازہ ہے
شبِ سفر ، ترا غم ، دشتِ ہول ، تنہائی
چہار سمت ، ہجومِ بلائے تازہ ہے
پکارتا ہوں تجھے یاد زارِ ماضی سے
فضائے کہنہ میں رقصاں ، صدائے تازہ ہے
نہ پوچھ ، منزلِ جاں کی سفر گذشت ، حبیب
ہر ایک گام پہ اک کربلائے تازہ ہے
قاضی حبیب الرحمن ۔۔۔۔۔ ترا خیال ، کُشادِ فضائے تازہ ہے
