گو ذرا سی بات پر برسوں کے یارانے گئے
لیکن اتنا تو ہوا کچھ لوگ پہچانے گئے
گرمئ محفل فقط اک نعرہء مستانہ ہے
اور وہ خوش ہیں کہ اس محفل سے دیوانے گئے
میں اسے شہرت کہوں یا اپنی رُسوائی کہوں
مجھ سے پہلے اُس گلی میں میرے افسانے گئے
وحشتیں کچھ اس طرح اپنا مقدر ہو گئیں (۱)
ہم جہاں پہنچے ہمارے ساتھ ویرانے گئے
یوں تو وہ میری رگِ جاں سے بھی تھے نزدیک تر
آنسوؤں کی دُھند میں لیکن نہ پہچانے گئے
اب بھی ان یادوں کی خوشبو ذہن میں محفوظ ہے(2)
بارہا ہم جن سے گلزاروں کو مہکانے گئے
کیا قیامت ہے کہ خاطر کشتۂ شب بھی تھے ہم(3)
صبح بھی آئی تو مجرم ہم ہی گردانے گئے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بار اول
مجموعہ کلام: خواب در خواب
پبلشر: سنگِ میل پبلی کیشنز، لاہور
سنِ اشاعت: ۱۹۸۵ء (بار اول)
……………………………
بار دوم: ۱۹۹۶ء
پبلشر: سنڈیکیٹ آف رائیٹرز (رجسڑڈ) پاکستان، پشاور
اہتمام: القلم، شان پلازہ، اسلام آباد
…………………………………..
(1) دوسرے ایڈیشن میں مصرعہ کی صورت یوں ہے:
وحشتیں کچھ اس طرح اپنا مقدر بن گئیں
(2) اس شعر کا اضافہ دوسرے ایڈیشن میں ملتا ہے
لیکن اب بھی ان یادوں کی خوشبو ذہن میں محفوظ ہے
بارہا ہم جن سے گلزاروں کو مہکانے گئے
(3) دوسرے ایڈیشن میں اس مصرعہ کی صورت یوں ہے۔
کیا قیامت ہے کہ خاطر کشتۂ شب تھے بھی ہم