حامد یزدانی ۔۔۔ بہار

بہار
۔۔۔
کیا ہوا؟
کیا بہار آ گئی؟
کھل اُٹھا زخمِ خوابِ ہنر!
پھر دہکنے لگی ہے نظر!
یاد روشن ہوئی
اب کے کچھ اس طرح یاد روشن ہوئی
گھر کے تاریک کونے چمکنے لگے
میری البم میں ٹھہرے ہوئے موسموں کو خبر ہو گئی
تیری مہکی ہوئی، سرخ تصویر پر
۔۔۔۔۔۔۔ پھول کس نے سجایا
۔۔۔۔۔۔۔ بجھے خواب سے پھوٹتی
مرمریں کارنس سے اُترتی ہوئی بیل
۔۔۔۔۔۔۔۔۔ روشن انگیٹھی سے ہوتی ہوئی
کیوں بھلا ؟ میز تک آ گئی ہے
۔۔۔۔۔۔ گلابی کہانی میں رکھا ہُوا خواب
۔۔۔۔۔۔۔ کس نے چُرایا ؟
۔۔۔۔۔۔۔ مرے حرف کے آئنے کو خزاں رنگ کس نے بنایا؟
۔۔۔۔۔۔۔ نظر میں مہکتے ہوئے
میری البم میں ٹھہرے ہوئے موسموں کو خبر ہو گئی
سبز شاخوں میں دبکا ہُوا وقت خاموش ہے
کیا ہُوا ؟
کیا بہار آ گئی ؟
کھل اُٹھا زخمِ خوابِ ہنر!
پھر دہکنے لگی ہر نظر!
۔۔۔۔۔۔۔۔۔۔۔۔۔۔۔

مجموعہ کلام: گہری شام کی بیلیں
اہتمامِ اشاعت: الاشراق پبلی کیشنز، لاہور
سنِ اشاعت: اپریل ۲۰۰۷ء (اشاعتِ اول)

 

Related posts

Leave a Comment