نجیب احمد ۔۔۔ پرندے پانیوں کے ساتھ چلتے ہیں

پرندے پانیوں کے ساتھ چلتے ہیں
۔۔۔۔۔۔۔۔۔۔۔۔۔۔۔۔
پرندے پانیوں کے ساتھ چلتے ہیں
یہ کس پانی کے ساتھی ہیں، یہاں دریا نہیں چلتے
ہوا کے پھول کھلتے ہیں نہ اب موسم بدلتے ہیں
مری چھاگل میں پانی ہے نہ دل میں قطرہء خوں ہے
نہ میرے تن کی مٹی پر ردائے ابر کا ٹکڑا
فضا میں دھوپ کی چنگاریاں سی اُڑ رہی ہیں اور مَیں ان جلتی بجھتی مشعلوں
۔۔۔۔۔کے درمیاں اپنی فصیلِ ذات کے پیچھے ردائے ہجر کی بُکل میں بیٹھا
۔۔۔۔۔منتظر ہوں، اُن برستی بارشوں کا، جن برستی بارشوں میں بھیگنے والی
۔۔۔۔۔ہوا کی سبز مُٹھی میں ترے ہونے کی خوشبو ہے، تری آنکھوں کا
۔۔۔۔۔موسم ہے، ترے لہجے کی شبنم ہے
مگر یہ بات کیا کم ہے
مَیں ان چنگاریوں کی جلتی بجھتی مشعلوں کے درمیاں اپنے بدن کو راکھ میں
۔۔۔۔۔تبدیل ہوتے دیکھ کر بھی چپ کھڑا ہوں اور یہ آنکھیں دھوئیں سے
۔۔۔۔۔بھر چکی ہیں، ادھ جلی گلیوں میں تیرے لوٹ آنے کا گماں تک
۔۔۔۔۔حدتِ لاحاصلی سے راکھ میں ڈھل کر نہ رہ جائے
۔۔۔۔۔۔۔۔۔۔۔۔۔۔۔مری پہچان تک جل کر نہ رہ جائے
پرندے پانیوں کے ساتھ چلتے ہیں
یہ کس پانی کے ساتھی ہیں، یہاں دریا نہیں چلتے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

Related posts

Leave a Comment