پت جھڑ میں کِھلتے گلاب ۔۔۔۔۔ جلیل عالی

پت جھڑ میں کِھلتے گلاب
۔۔۔۔۔۔۔۔۔۔۔۔۔۔۔۔۔۔۔۔۔
شِفا نام تیرا
تری ہر ہُمک۔جانِ لختِ جگر!
زندگی کی گُمک ،فرح و آرام میرا
شب و روز کی سر گرانی،
غبارِ غمِ رایگانی جھٹکنے کی رَو میں
یہی کام میرا
کہ زنجیرِ معمول کو توڑ کر ،
سوچ کے ہر سروکار کو چھوڑ کر
میں ترے پاس آئوں
تجھے پھول سا جھُولنے سے اُٹھائوں
ترے ساتھ معصوم و بے ربط باتیں کروں
اپنے اندر کا بالک جگائوں
تری موہنی ، مست مُسکان کی
چاندنی میں جِیئوں
وقت کی دُھوپ سامانیاں ،
سب پریشانیاں بُھول جائوں
سرِ شاخِ تازہ شگوفوں کی صورت
ترے اَدھ کھِلے ہاتھ غُنچوں کی لہروں کے سنگ

غُوں غُوں، چُسر چُوں،
اَمُوں مُوں، اَبُوں بُوں،
کبھی مَیں کبھی تُوں کے صد رنگ آہنگ سے
اپنے چہرے کی شکنوں کو ہمواریاں دوں
خزاں موسموں کے ستائے ہوئے
تیری قربت کے احساس سے
گُدگُدائے ہوئے
تن کو گلزاریاں ،
من کوقِلقاریاں دوں
تجھے دل سے نکلی ہوئی لوریوں میں
دعائیں مجھے جس قدر یاد ہیں
ساریاں دوں

Related posts

Leave a Comment