ہو کیوں نہ تِرے کام میں حیران تماشا
یا رب ! تِری قُدرت میں ہےہر آن تماشا
لے عرش سےتا فرش نئے رنگ، نئے ڈھنگ
ہر شکل عجائب ہے، ہر اِک شان تماشا
افلاک پہ تاروں کے جھمکتے ہیں طلسسمات
اور رُوئے زمیں پر گل و ریحان تماشا
جِنّات، پَری، دیو، ملک، حوُر بھی نادر
اِنسان عجوبہ ہیں تو حیوان تماشا
(ق)
جب حسن کے جاتی ہے مرقع پہ نظر، آہ!
کیا کیا نظر آتا ہے ہر اِک آن تماشا
چوٹی کی گندھاوٹ کہیں دِکھلاتی ہےلہریں
رکھتی ہے کہیں زُلفِ پَریشان تماشا
(ق)
گر عِشق کےکوُچے میں گُزر کیجے، تو واں بھی
ہر وقت نئی سیر ہے، ہر آن تماشا
منہ زرد، بدن خشک ،جگرچاک ،الم ناک
غُل شور، تَپش نالۂ و افغان تماشا
۔۔۔۔۔۔۔۔۔
ہم پست نگاہوں کی نظر میں تو، نظیر، آہ!
سب ارض و سما کی ہے گلستان تماشا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
کلیاتِ نظیر اکبر آبادی
طبع اول: ۱۹۷۶ء
پبلشر: رام نرائن لال بینی مادھو ، ۲۔ کڑہ روڈ، الہ آباد
