اَمّی کے لیے
۔۔۔۔۔۔۔۔
بدن اب سرد ہوتا جارہا ہے
کوئی عہدِ گذشتہ آنے والی ساعتوں کی
گرد ہوتا جارہا ہے
لہو اب جم رہا ہے
رگوں میں دوڑتا سیال آخر تھم رہا ہے
زباں بے ذائقہ محلول سے مانوس کیسے ہو
زباں! بے ربط جملوں اور پھر
ٹوٹے ہوئے لفظوں سے آ گے کچھ نہیں کہتی
زباں خاموش رہتی ہے
کئی مہمل سوالوں کا جواب
اک جنبشِ سر سے زیادہ کچھ نہیں ہوتا
یہ جب ہوتا ہے جب دل میں ارادہ کچھ نہیں ہوتا
لبوں پر پپڑیاں سی جم رہی ہیں
بہت ہی اَن کہی با تیں انھی چٹخے ہوئے ہونٹوں کی
بوسیدہ دراڑوں میں کہیں روپوش ہوں
مگر دل منتظر کب ہے
نظر میں عکس مدھم ہو رہے ہیں
اب آنکھوں میں شناسائی کے بادل تیرتے ہیں
مگر چہرے نہیں بنتے
تو کیا کیجے اگر
آنکھوں کے سوتے خشک ہو جائیں
ستارے جھلملاتے ہیں مگر کس آسماں پر
سو اب سورج سے کیا لینا
کہاں کا چاند، کیسی کہکشانیں
تری چار ہ گری کس کام کی اے مہرباں لہجے
بس اب وہ پھول کھلنے ہیں
جو سانسوں سے تہی جسموں پہ پڑتے ہیں
بہت سی چاہتوں کو خاک میں کافور ہونا ہے
منوں مٹی تلے جب سو ہی جانا ہے
تو شب کیسی ،سحر کیسی
کسے معلوم جانے کتنی سانسیں
خوف کے بستر تک آئیں گی
سو اب یہ وقت کی رفتار بھی بے کار لگتی ہے
فقط آزار لگتی ہے
بس اب یہ دیکھنا ہے زندگی جاتے ہوئے
دروازہ کیسے بند کرتی ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ماہ نامہ فانوس، لاہور
جلد: ۵۸، شمارہ: ۷
جولائی ۲۰۱۸ء
