"گرہ کھل رہی ہے”
۔۔۔۔۔۔۔۔۔۔۔
اُدھڑنے کا لمحہ
سَروں پر لٹکتی ہوئی تیغ ہے اب
گماں اور حقیقت کی نیلی فضا میں
کہیں تیرتا ہے
وہ ذرّہ سا پَل
جب ترے ذہن و دل پر
وہ امکان اُترے
جو سب راز کھولے
تری انگلیاں اُس سِرے کو پکڑ لیں
جہاں اک قدیمی تسلسل تعطّل میں رکھا گیا ہے
تری مضطرب انگلیاں ایک ہلکی سی جنبش سے
ترتیب تبدیل کر دیں
سِرا کھینچ کر تُو
نئے ہی تسلسل کا آغاز کر دے
وہ دہشت ،جو امکان کی قید میں ہے
اُسے بے خیالی میں آزاد کر دے
سِرا کھینچنے اور پِنّا بنانے کی لذّت میں ،تُو بھول جائے
کہ کیا کچھ اُدھڑنے لگا ہے
اسی تانے بانے میں
تُو بھی کسی جا پرویا ہوا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
