غلام حسین ساجد ۔۔۔ کسی نگاہ کی زد پر ہے باغِ سبز مرا

کسی نگاہ کی زد پر  ہے باغِ سبز مِرا
کہ زرد پڑنے لگا ہے چراغِ سبز مِرا

سمجھ میں آ نہ سکا بھید اُس کی آنکھوں کا
اُلٹ کے رہ  گیا آخر دماغِ سبز مِرا

پلٹ کے آئی نہیں چھاؤں اُس کے کوچے سے
دَھرا ہے دُھوپ میں اب تک ایاغِ سبز مِرا

یہ معجزہ ہے زرِ عشق کی صداقت کا
کسی کے دل میں دھڑکتا ہے داغِ سبز مِرا

بدل گئی جو کبھی رنگ و نُور کی تہذیب
نہ مِل سکے گا کسی کو سراغِ سبز مِرا

گیاہ و سبزہ و گُل سے غرض ہو کیوں؟ ساجد!
کسی کو خوش نہیں آیا فراغِ سبز مِرا

۔۔۔۔۔۔۔۔۔۔۔

Related posts

Leave a Comment