بَن میں ویراں تھی نظر، شہر میں دل روتا ہے
زندگی سے یہ مِرا دوسرا سمجھوتہ ہے
لہلہاتے ہوئے خوابوں سے مری آنکھوں تک
رت جگے کاشت نہ کرلے تو وہ کب سوتا ہے
جس کو اس فصل میں ہونا ہے برابر کا شریک
میرے احساس میں تنہائیاں کیوں بوتا ہے
نام لکھ لکھ کے تِرا، پھول بنانے والا
آج پھر شبنمیں آنکھوں سے ورق دھوتا ہے
تیرے بخشے ہوئے اک غم کا کرشمہ ہے کہ اب
جو بھی غم ہو مرے معیار سے کم ہوتا ہے
سوگئے شہرِ محبت کے سبھی داغ و چراغ
ایک سایہ پسِ دیوار ابھی روتا ہے
یہ بھی اک رنگ ہے شاید مری محرومی کا
کوئی ہنس دے تو محبت کا گماں ہوتا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مجموعہ کلام: آٹھواں آسماں بھی نیلا ہے
فطرت پبلی کیشنز، لاہور
جولائی 1988ء