اِسی دن ۔۔۔ غلام محمد قاصر

اِسی دن
۔۔۔۔۔
اِسی دن آسمانی خواب کی ہم نے ہری تعبیر پہنی تھی
ہمارے ہاتھ میں نصرت کا پرچم
اور امکانات کے پھولوں کی ٹہنی تھی

ہم اس کی خواب گوں جھنکار سے آگے نکل آئے
کئی نسلوں نے جو زنجیر پہنی تھی

سنہرے لفظ دیواروں پہ کندہ ہوتے جاتے تھے
اجالوں کی طرف چُپکے سے وہ ہم کو بلاتے تھے

سبھی تسلیم کرتے ہیں
وہی بنتا ہے سچائی کو جب تجسیم کرتے ہیں
ہم اپنے رہنما کی اس طرح تعظیم کرتے ہیں
کہ اس کے خواب کو تقسیم در تقسیم کرتے ہیں

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

مجموعہ کلام: دریائے گماں
الحمد پبلی کیشنز، لاہور
سالِ اشاعت: 1997ء

Related posts

Leave a Comment