رباعیات
تخلیق کے لمحات میں آفاق آثار
میری تمثال، میرے تمثال نگار
یا غرفۂ شب میں اک مہکتا ہوا چاند
یا پردۂ شام پر دہکتے انگار
۔۔۔
اب دُور نہیں کشتیِ جاں کی منزل
مل جائے گا بحرِ آرزو کا ساحل
دشت ِ سفرِ فراق تو کچھ بھی نہیں
دوچار گھڑی کہیں بہل جا‘ اے دل!
۔۔۔
منزل تک مختصر سفر باقی ہے
اے میری ہم سفر! سفر باقی ہے
اے عمرِ رواں! کہیں ذرا سستا لے
کچھ کم ہی سہی مگر سفر باقی ہے
۔۔۔
ہر عہد کے دامن میں نہیں فصلِ گلاب
ہوں جس سے مسرتوں کے غنچے شاداب
فطرت کا اصول ہے، نہیں ہو سکتا
ہر رات کی کوکھ سے طلوعِ مہتاب
۔۔۔
ہر روز نیا بابِ سفر کھلتا ہے
ہر منظرِ نو نگاہ پر کھلتا ہے
کھلتا ہے دروازۂ مشرق خالد
یا تازہ مصیبتوں کا در کھلتا ہے
۔۔۔
گردابِ حوادث میں کہاں تک رہتے
کب تک طوفان کے تھپیڑے سہتے
شل ہو گئے دست و پا تو دم ٹوٹ گیا
بحرِ آشوبِ جاں میں بہتے بہتے
۔۔۔
بحرِ ستم و جور میں بہنے کے لیے
ظلمت کدۂ جہاں میں رہنے کے لیے
زندہ ہے آدمی مسلسل خالد
حالات کا سرد و گرم سہنے کے لیے
۔۔۔
آنے کو ہے ایک پل نہ ٹلنے والا
اندازِ حیات ہے بدلنے والا
گم کردۂ راہِ راست کچھ ہوش میں آ
ہے عمر کا آفتاب ڈھلنے والا
۔۔۔
