مثالِ موجِ صبا اعتبار اپنا نہیں
کہ دل تو اپنا ہے پر اختیار اپنا نہیں
یہ برگ و بار، یہ سرو و سمن اُسی کے ہیں
کوئی گلاب سرِ شاخسار اپنا نہیں
نہ منزلوں کی خبر ہے، نہ کارواں ہے کوئی
مگر قیام سرِ رہ گُذار اپنا نہیں
اُنھی کا خوف اُنھی سے خطر جو اپنے ہیں
امید ہے تو اُسی سے ہزار اپنا نہیں
گئے وہ دن کہ ہمی پیاس تھے ہمی شبنم
نہ جانے کس کا ہے اب انتظار، اپنا نہیں
یہ اور بات کہ شامل غبارِ راہ میں ہیں
تمھارے ہم سفروں میں شمار اپنا نہیں
کچھ اہتمامِ سحاب و صبا کریں تو کریں
کہ اِس نگر میں کوئی سوگوار اپنا نہیں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ماہ نامہ فانوس، لاہور
جلد: ۵۸، شمارہ: ۶
جون ۲۰۱۸ء
