بیت بازی – صفحہ 214

ظہور نظر

پاس ہمارے آ کر تم بے گانہ سے کیوں ہو؟ چاہو تو ہم پھر کچھ دُوری پر چھوڑ آئیں تمھیں

دور گگن پر ہنسنے والے نرمل کومل چاند! بے کل من کہتا ہے، آؤ، ہاتھ لگائیں تمھیں

اُڑتے پنچھی، ڈھلتے سائے، جاتے پَل اور ہم بیرن شام کا تھام کے دامن روز بلائیں تمھیں

رنگ برنگے ہاتھ تمھارے ہجر میں ہاتھ آئے پھر بھی یہ کیسے چاہیں کہ ساری عمر نہ پائیں تمھیں

جن باتوں نے پیار تمھارا نفرت میں بدلا ڈر لگتا ہے وہ باتیں بھی بھول نہ جائیں تمھیں

درد ہماری محرومی کا، تم تَب جانو گے جب کھانے آئے گی چُپ کی سائیں سائیں تمھیں

دل کے زخم کا رنگ تو شاید آنکھوں میں بھر آئے روح کے زخموں کی گہرائی کیسے دکھائیں تمھیں

ترکِ محبت، ترکِ تمنّا کر چُکنے کے بعد ہم پہ یہ مُشکل آن پڑی ہے کیسے بُھلائیں تمھیں

دیپک راگ ہے چاہت اپنی، کاہے سنائیں تمھیں ہم تو سلگتے ہی رہتے ہیں، کیوں سُلگائیں تمھیں

ساری دنیا کی نظروں میں جھوٹے ہیں اندر سے ہم لوگ جو ٹوٹے پھوٹے ہیں