آئی جو میرے کان میں پازیب کی صدا
گھبرا کے میری جاگ کھلی، اُٹھ کھڑا ہوا
یہ حور ہے، پری ہے کہ انساں ہے، کیا ہے یہ؟
پہروں میں اپنے دل میں یہی سوچتا رہا
کالی بھنویں کمانیں تھیں اور پلکیں تیر تھیں
موتی کی طرح دانت تھے، ہونٹوں میں قند تھا
اے بے بصر! نگاہ اٹھا کر نظارہ کر
اُس نے عجب اَدا سے مجھے دیکھ کر کہا
تو جانتا نہیں ہے مَیں وہ مہ جبین ہوں
پیدا جواب جس کا زمانہ نہ کر سکا
طالب ہیں میرے بوسہء رخسار کے بہت
تو کتنا خوش نصیب ہے، میں نے تجھے چُنا
وعدے وفا کے کرتی رہی رکھ کے لب پہ لب
ناز و ادا سے جامِ مئے ارغواں دیا
راز و نیاز ہوتے رہے اس سے رات بھر
شوقِ وصال ابھی میرا پوارا ہوا نہ تھا
اک سمت سے صدائےاذاں آئی ناگہاں
سنتے ہی مجھ کو چھوڑ کے چل دی وہ دل رُبا
اے کاش! ایسی شب کی نہ ہوتی کبھی سحر
کیا جانے حشر کیا ہو دلِ بے قرار کا
بستر سے شعلے اٹھتے ہیں، پھنکتا ہے سب بدن
جب سے ہُوا ہوں اُس سے میں خوش حال خاں جُدا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مجموعہ کلام: خوش حال خان کے افکار
منظوم ترجمہ: فارغ بخاری، رضا ہمدانی
نیا مکتبہ قصہ خوانی، پشاور
(کتاب پر سنِ اشاعت کا اندراج نہیں ہے، تاہم فارغ، رضا نے دیباچہ کی تاریخ ستمبر ۱۹۶۵ء درج کی ہے۔)
