ک – صفحہ 9

احمد مشتاق

کسی جانب نہیں کھلتے دریچے کہیں جاتا نہیں رستہ ہمارا

کب کسی کی ہوئی ہے یہ دنیا ہم عبث چاہ میں پڑے ہوئے ہیں

کس محبت سے آئے ہیں سیلاب گھر میں ہوتا اگر تو بہتا کچھ

کس سے پوچھوں یہاں پتا اپنا دھوپ کچھ کہہ رہی ہے، سایہ کچھ

کسی کی زلف پریشاں کسی کا دامن چاک جنوں کو لوگ تماشا بنائے پھرتے ہیں

کچھ سانس بچ رہے تھے سو وہ سانس بھی لیے وعدہ خلاف تھے ، سو ترے بعد جی لیے

کچھ غمِ زیست کے شکار ہوئے کچھ مسیحا نے مار ڈالے ہیں

کتنی ساکت فضا ہے دنیا کی مُڑ کے دیکھوں تو حادثہ ہو جائے

کوئی آواز‘ نہ پتھر‘ نہ تبسم‘ نہ خلوص اب ترے شہر میں ہم کیسے رہیں سوچ میں ہیں

کیا زمیں کیا آسماں کچھ بھی نہیں ہم نہ ہوں تو یہ جہاں کچھ بھی نہیں